Nole se vratio na posebno mjesto pa poslao jasnu poruku: „Sada se osjećam dobro“

Novak Đoković uspješno je otvorio nastup na ATP turniru u Pekingu, gdje je u prvom kolu savladao Portugalca Nuna Boržeša rezultatom 6:3, 7:6 (7:2).

Srpski teniser vratio se u Peking nakon čak 11 godina, a povratak je obilježio pobjedom kojom je nastavio nevjerovatan učinak na ovom turniru. Đoković sada ima 30 pobjeda iz isto toliko odigranih mečeva u Pekingu.

Nakon susreta posebno je istakao koliko mu odgovara atmosfera u kineskoj prijestolnici.

„Drago mi je da sam se vratio na moje sretno mjesto. Hvala vam što ste popunili stadion, atmosfera je bila fenomenalna. Ovo je kombinacija različitih stvari. Volim da igram ovdje, a uslovi u večernjim terminima odgovaraju mojoj igri“, rekao je Đoković.

Prisjetio se i svog posljednjeg nastupa u Pekingu prije više od decenije.

„Prije 11 godina je bilo tako. Ja više nisam isti igrač, ali i sada se osjećam dobro ovdje“, poručio je srpski as.

Đoković je govorio i o vremenu koje je proveo uoči početka turnira, naglasivši da je imao priliku bolje upoznati kinesku kulturu i običaje.

„Juče smo se proveli sjajno, upoznavali smo kulturu i običaje. Ima puno toga da se nauči. Kroz cijelu karijeru to pokušavam da radim“, kazao je.

Za plasman u treće kolo Đoković će igrati protiv domaćeg predstavnika Bu Junčaoketea.